سرية فكر
سرى فكري وانا (فزّاع) والدنيا بها ضَجّه = واظنّ ان الشِّعِر هاليوم يبى يقضي على حاجه
سرى بْليلٍ وفي بحرٍ يعانِد غزره وْلجّه = يقاوم جرّة التيّار ولو تطمي به أمواجه
بحور غْزار يبغيها لأصعب دَرْب متوجّه = يبى روس العلا وْيقدر على صعبات اْلِمْواجه
يطول الدرب كم بيطول وحرف القافيه غَلْجَه = ولكن يقدر ان يبني بيوته تصبح أبراجه
على وصف الجميل الفاتن الساحر لنا حِجّه = مادام الحب هو ليل المتيّم أو هو سْراجه
عنودٍ رمشها سَلْهَم وعينٍ ناعسه دَعْجه = وخدّ مْورّد ومِنْوِر طبيعي دون مكياجه
ووجهٍ من سنا نوره على البَهْجه ضفى بَهْجه = مزونٍ غيثها البسمه ليا من تضحِك حْجاجه
وميدولٍ على متنه كما داج الدجى هَجّه = على عودٍ كما قزّ الحرير الناعم انتاجه
جميل وكل ما فيه الجمال سْكوته وهَرْجه = واذا للزين منهاجٍ حبيبي الزين منهاجه
أهو تاج الجمال .. إلاّ مداه اللي تبَعْ نهجه = وانا اشهد بانّ حِسْن الفاتنات لْصاحبي تاجه
تصدّق من كِثر حِسْنِك تصيب بعالمك رجّه = ولي تبغي له احراجٍ بحسنك تملِكْ احراجه
حبيبي لا تلوم القلب ، لوم عْيونك الدَعْجَه = بها حاجه ولا ادري وش بها لكن بها حاجه
دخيلك يا هوى بالي حبيبك في الهوى نَجّه = ترى حبّك سبب همّه وصدّك سبّة ازعاجه
واذا المطلوب مِ الخَفّاق منّي يطلب الرِفْجَه = ورِفْجَه ما أردّه دام هذا القلب محتاجه
