تدلل يآخر العنقود

صباح / مساء الــــوردي


شخباركم ؟


هالسالفه استوت من فتره بس اليوم اتفيجت اكتبها


من فتره وصلتني رساله في المنتدى من بنت كاتبة تبا تتعرف علي وتكون ربيعتي وحطتلي ايميلها ,,

انا شفت مشاركاتها 1 ,, فأستغربت كيف عرفت عني وطرشت ,, بغيت اقولها هالشي بس خفت اجرحها

وشفت انها من دوله عربية , فقلت حلووو اني اتعرف على وحدة من هاي الدولة عشان اعرف عنهم اكثر فظفتها عندي


وعقب كم يوم دشت ,,

جان اتقولي انتي منو ومن وين >>> يمكن ماعرفت اني انا الي عطتني ايميلها


وانا بس قتلها اني من الامارات


فأتخبلت واستااااااااانست وايد ,, وقالت انا وايد احبكم وكله اتابع قنواتكم ,, ومن زمان خاطري اعرف وحدة من الامارات

وانا سالتها انتي من وين ,, وقالتلي وجي


وبس ماطول الحوار وايد


جان اتقولي انا حبيتج واااااايد ,, وقتلها انا بعد ^^

وبعدين مادري شو استوى فيها , تمت اتقول انا احبج انا اموت فيج انتي دخلتي قلبي وانتي وانتي ........ الخ


وجان اتقولي انا ابا اخطبج موافقة !!!!


انا انصدمت ,, قتلها لمنو , وشسالفة !!!!


قالتلي ياحلوة انا مب بنت ,, لين الحين مافهمتي ..


جان اسكت من الصدمة ,, كيف من الصبح اكلمها على انها بنت , الحين من صدقها ولا مقلب !!!!

وكنت على طول بسويله بلوك ودليت ,, بس قلت خلني اشوف السالفة عقب ..


جان يقول انا جاد وصدق بخطبج , وبيي بسكن عندج في الامارات , وانا احبج وغيرها من الكلام الفاضي


فأنا نقعــــــــــــــت من الضحك على الجذب الي اشوفة , كيف حبني وهو ماعرف عني شي هههه

و اتخيل انا اخذ واحد من ........... والله نكته


وحطيتله ظحكة وجي , جان يعصب وقالي لاتتمصخرين انا ارمس جد


فقلت يلا باخذه على قد عقلة , وقتله اهلي مابيوافقون , في الامارات البنت ماتزوج من واحد غير جنسيتها ..

فزعل , واونه انكسر قلبة هههه


جان اقولة خلاص اسمحلي انا بسويلك بلوك ودليت لاني ماكنت اعرف انك شاب مب بنت , وانت خدعتني ..



فقال لا لحظة اخر طلب ..


قالي لان مستحيل انكون لبعض ,, فشو رايج انسوي مشروع انا وانتي

قالي انتي يبي راس المال وانا الي بسويه

فتميت اضحك

قالي انا ارمس جد لاتضحكين

انا ابا ادير اموالج , ولا ايي حد ثاني ويقص عليج وياخذ الملاين الي في رصيدج


هني مت من الضحــــــــك ,, قلت لا لا اكيد هذا مقلب من وحدة من ربيعاتي

لان كل شوي يطلعلي بموضوع يضحك اكثر عن الثاني


وكتبتله ملايين في رصيدي , ليش شو شايفني مديرة بنك ,, انا طالبة في الجامعة

قالي حتى لو , انتو في الامارات كل شخص جي عندة

وعقب تم يتحرطم , وقال الاماراتين بخلة ومايطلعون فلوسهم , انتو كلة اتجمعون بس ماتعطون للمحتاج ,


انا هني عصبت , ما ارضى حد يغلط على بلادي ,, وإتأكدت ان السالفة جد ولا مقلب ولا شي ..



جان اقولة اولا فكرتك غلط مب كل شخص عندة ملاين , في بلادنا في الغني والمتوسط والفقير

و بعدين لاتقول شي ماتعرفه


الحين نحن بخلة !!!

نحن اكثر دولة تتبرع وتساعد المحتاجين وتسوي حملات التبرعات

مساعداتنا وصلت كل دول العالم ,, لازم في كل دولة بتلقى مستشفيات ومساجد ومدارس مسوينها ..



وقتلها خلاص روح وبسويلك بللوك ودليت , ومرة ثانية لاتقص على حد اونك بنت !!!!





شو رايكم في الموضوع ,, واحس السالفة فيها وايد نقاط :


اولا : انه قص علي برسالة انه بنت ><

ثانيه : مثل انه يحبني موووت ,, يعني لو بنت مراهقة او شي كانت ممكن اتصدق وتنخدع ..

ثالثا : شفتو كيف كانت نيتة المصلحه ويبا يستغلني ..

رابعا : فكرتة عن دولتنا الحبيبة وعن الاماراتيين ..




اتريا تفاعلكم وتعليقكم ,,, والله سوري طولت ><

مهم " في وحدة ضافتني من فتره بسيطة وتقول انها طلبت ايميلي من الادارة وعطوها , وانهم عادي يعطون لبنت , هل هالشي صدق ؟؟ "