هذي مظاهر مثل ريش الطواويس = عادة طيور وصارت بعادة الناس
هذي المسائل حلّها بالتوسويس = طافت فروخ وصادها اليوم جرناس
قال الموصّف لي به الوصف تأسيس = هذاك لي وصفه على العين والراس
أشوف زولك داخل القلب جلّيس = لو كان في وسط المعاليق عكّاس
هذي المحبّه كلّها بالأحاسيس = حس البعيد وحس أقرب من انفاس
القلب له واحد ولا مزرة الكيس = وخلّك تعرف وش حاجة الناس للناس
خلّك بوادي فيه خضر المغاريس = توطى على الأخضر ولا تدوس يبّاس
بعض الكلام أحيان يبغي تلمّيس = لمسه تهدّي الروع من لمسة احساس
بين العشق والحب دستور تدريس = ولا لا تشبّه لمعة زجاج بالماس
الشاطر اللي يعرفه بالمقاييس = يعرف خطاها دون ما يصيبه الباس
كل شيّ قبل لا يستوي له تأسّيس = يكبر ويكمل كل ساسٍ على ساس
خلّ الغرام يعاتب القلب ويجيس = نبضه على شان الهوى يطرد الياس
وتحط في قلبك شرى عرش بلقيس = من زِين شِعْرك لبّست شعرك لْباس
واليوم ليلتنا ترى ليلة خْميس = والموعد اللي بيننا وقت الاغلاس
دايم واحذر توعّي تختّل ابليس = واكتب أخو فزّاع ما بين الأقواس